Izraeli njeh si shtet të pavarur rajonin e shkëputur të Somalisë, Somaliland

Izraeli e njohu sot rajonin separatist të Somalisë, Somalilandin, si shtet të pavarur dhe sovran, një veprim që pritet të sjellë një valë reagimesh dënuese në rajon. “Unë shpalla sot zyrtarisht njohjen e Republikës së Somalilandit si shtet të pavarur dhe sovran”, tha në një deklaratë kryeministri izraelit Benjamin Netanjahu. Sipas deklaratës, Netanjahu, së bashku me ministrin e Jashtëm Gideon Sa’ar dhe presidentin e Somalilandit Abdirahman Mohamed Abdullahi, “nënshkruan një deklaratë të përbashkët dhe reciproke”.

“Kjo deklaratë është në frymën e Akordeve Abrahamike, të nënshkruara me nismën e Presidentit Trump”, ka thënë ai.

Akordet Abrahamike janë marrëveshje të nënshkruara në vitin 2020 midis Izraelit dhe Emirateve të Bashkuara Arabe, Bahreinit, Sudanit dhe Marokut për normalizimin e marrëdhënieve.

Sipas deklaratës, Netanjahu e ka ftuar presidentin e Somalilandit për një vizitë zyrtare në Izrael.

Nuk pati menjëherë ndonjë reagim nga qeveria somaleze lidhur me deklaratën e Netanjahut.

Somalilandi, i cili ka qenë pa njohje zyrtare që prej shpalljes së pavarësisë nga Somalia në vitin 1991, funksionon si një ent de fakto i pavarur administrativ, politik dhe i sigurisë, me qeverinë qendrore që nuk arrin të ushtrojë kontroll mbi rajonin dhe me udhëheqjen e tij që nuk ka mundur të sigurojë njohje ndërkombëtare të pavarësisë.