Ish-kryeministri britanik, Rishi Sunak, do të bëhet pjesë e bankës së njohur “Goldman Sachs” si këshilltar i lartë.
I larguar një vit më parë nga detyra, Sunak do të punojë me kohë të pjesshme, ndërsa ai vazhdon të jetë deputet i konservatorëve për zonën e #Richmond dhe #Northallerton në #Yorkshire.
#Sunak ka punuar në fillim të viteve 2000 në bankën shumëkombëshe të investimeve dhe shërbimeve financiare, përpara se të përfshihej në politikë.
Paga e ish-kryeministrit në bankë do të dhurohet për “The Richmond Project”, një fondacion bamirësie, i themeluar nga ai në fillim të vitit, së bashku me bashkëshorten Akshata Murty.
Megjithatë një Komitet Këshillues për Emërimet në Biznes, i cili duhet të japë miratimin për punësimin e ish-ministrave deri në dy vjet pas largimit nga posti shtetëror, tha se emërimi i Sunak në bankë mbartte rrezikun që #GoldmanSachs të përfitonte nga aksesi jo i ndershëm në informacion për shkak të detyrës së tij si Kryeministër.
Ai nuk do të lejohet të këshillojë qeveri të huaja apo fondet e tyre sovrane për llogari të bankës apo të ndihmojë klientë me të cilët ka patur marrëdhënie direkte gjatë kohës që ishte kryeministër.
Gjithashtu Sunak nuk mund të lobojë pranë qeverisë britanike për llogari të bankës ku punon.
