Kryeministri Edi Rama ka njoftuar se ka marrë një ftesë personale nga presidenti i Shteteve të Bashkuara të Amerikës, Donald J. Trump, për të përfaqësuar Shqipërinë në Bordin Ndërkombëtar të Paqes, një organizatë e re e ideuar dhe e kryesuar nga presidenti amerikan për paqen në Lindjen e Mesme dhe Gaza.
Sipas Ramës, Shqipëria është ftuar si anëtare themeluese, çka ai e cilësoi si një vlerësim të lartë ndërkombëtar dhe një arritje të rëndësishme për rolin e vendit në arenën globale.
Kryeministri është shprehur se kjo ftesë pasqyron nivelin e ri të marrëdhënieve strategjike mes Shqipërisë dhe Shteteve të Bashkuara, duke theksuar respektin dhe vlerësimin e veçantë ndaj shtetit shqiptar.
“Nuk mund të jem dot më krenar për Shqipërinë dhe për gjithçka kemi bërë në këto vite, duke e kthyer në një Shqipëri tjetër, të dinjitetshme e të respektuar botërisht si asnjëherë, e padiskutim edhe për nivelin ku e kemi ngritur marrëdhënien e partneritetit tonë strategjik me Shtetet e Bashkuara, duke u ftuar me një respekt e vlerësim krejt të posaçëm nga presidenti Trump”, ka shkruar Rama.
Leave a Reply