Vajza e presidentit të Shteteve të Bashkuara, Donald Trump, Ivanka Trump ka mbërritur të mërkurën në qytetin bregdetar të Vlorës. Ajo është shoqëruar nën masa të rrepta sigurie nga policia, teksa mësohet se po qëndron në një nga hotelet në zonën e “Ujit të ftohtë”.
Ivanka Trump ka vizituar zonën e Novoselës dhe më pas edhe Zvërnecin. Gjithashtu, në itinerarin e saj ka qenë edhe zona bregdetare e njohur si Porto Novo. Kjo nuk është hera e parë që vajza e presidentit amerikan Donald Trump, Ivanka Trump viziton Vlorën.
Në mbrëmje, Ivanka Trump ka takuar kryeministrin Edi Rama në qytetin e Vlorës.
Së bashku me bashkëshortin e saj, Jared Kushner, Ivanka Trump kaloi disa ditë nga pushimet verore qershorin e kaluar në qytetin bregdetar.
Kompania e madhe ndërkombëtare në fushën e turizmit me sipërmarrës dhëndrin e presidentit të SHBA, Donald Trump, “Atlantic Incubator Partners LLC”, ka paraqitur pranë Agjencisë Shqiptare të Zhvillimit të Investimeve (AIDA) në 27 dhjetor 2023, një projekt për të investuar në ishullin e Sazanit.
Në 30 dhjetor 2024 kompania e Jared Kushner mori statusin e investitorit strategjik për ndërtimin e një resorti luksoz në ishullin e Sazanit, nga Komiteti i Investimeve Strategjike nën drejtimin e kryeministrit Edi Rama.
Sipas vendimit të KIS, në ishull parashikohet një investim prej 1,4 miliardë eurosh dhe ndërtimi parashikohet të shtrihet në 8% të ishullit, ose 45 hektarë.
Projekti, një investim strategjik, parashikon ndërtimin e vilave ekskluzive në ishullin e Sazanit, që i kushtohen turizmit elitar.
Sazani shtrihet midis detit Adriatik dhe detit Jon, i pozicionuar strategjikisht në hyrje të gjirit të Vlorës, në ngushticën e Otrantos që ndan Italinë nga Shqipëria.
Leave a Reply