I dërguari i ShBA-së për Lindjen e Mesme, Steve Witkoff, dhe ministri i Jashtëm iranian, Abbas Araghchi, pritet të zhvillojnë bisedime në Istanbul të premten, si pjesë e përpjekjeve të ripërtërira diplomatike lidhur me programin bërthamor të Iranit, sipas një lajmi të publikuar nga Axios. Duke cituar burime të njohura me diskutimet, Axios thekson se përgatitjet për takimin janë duke u zhvilluar, ndërsa një burim tjetër ka paralajmëruar se planet mbeten të ndryshueshme dhe ende nuk janë finalizuar.
Bisedimet e planifikuara vijnë pas deklaratës së presidentit amerikan Donald Trump javën e kaluar, i cili në një postim në rrjetet sociale tha se një “armadë” e madhe po i drejtohej Iranit, duke i bërë thirrje Teheranit të hynte menjëherë në negociata. Më pas, ai deklaroi se Irani po “bisedon seriozisht” me ShBA-në.
Presidenti amerikan ka kërcënuar me veprime ushtarake kundër Iranit, në mes të rritjes së tensioneve pas protestave antiqeveritare në Iran në fund të dhjetorit.
Zyrtarët iranianë kanë paralajmëruar se çdo sulm nga ShBA-ja do të përballej me një përgjigje “të shpejtë dhe gjithëpërfshirëse”.
Ndërkohë, lajmi thekson gjithashtu se Türkiye, Egjipti dhe Katari kanë luajtur rol kyç në lehtësimin e kontakteve mes Washingtonit dhe Teheranit ditët e fundit.
Ministri i Jashtëm iranian, Araghchi, udhëtoi në Stamboll të premten e kaluar, ku zhvilloi bisedime me presidentin turk Rexhep Taip Erdogan dhe ministrin e Jashtëm Hakan Fidan.
Leave a Reply