Ministrja e Jashtme e Shqipërisë, Elisa Spiropali, takoi në Uashington Charles McLaughlin, Asistent Special i Presidentit Trump dhe Drejtor i Lartë për Evropën dhe Rusinë, Këshilli i Sigurisë Kombëtare (NSC). ‘U ndalëm te potenciali i thellimit të partneritetit strategjik Shqipëri–SHBA dhe veçanërisht te roli i ri i Shqipërisë si Anëtare Themeluese e Bordit të Paqes. Përfaqësimi nga Kryeministri Rama në këtë iniciativë fisnike të Presidentit Trump, përveçse e ripozicionon Shqipërinë si kontribuese aktive në çështjet e sigurisë dhe paqes, i jep një tjetër përmasë bashkëkoordinimit me aleatin tonë historik”, tha Spiropali pas takimit në Shtëpinë e Bardhë.
Kryediplomatja shtoi se në takim u nda bindja se Bordi i Paqes do të jetë në thelb Bordi i Veprimit, një iniciativë e orientuar nga parimet për zgjidhjen e qëndrueshme të konflikteve.
“Shqipëria është e nderuar të jetë gjithashtu në krah të SHBA-së si anëtare inauguruese e Forcës Ndërkombëtare të Stabilizimit, ISF, në linjë me planin 20-pikësh të Presidentit Trump për Gazën, si një vend që eksporton stabilitet e siguri”, tha Spiropali.
Sipas saj, gjatë takimit u konfirmua gatishmëria e Tiranës për mbajtjen e sesionit të dytë të Dialogut Strategjik, për të thelluar më tej marrëdhëniet në të gjithë sektorët me interes të përbashkët ekonomik, tregtar, energjetik e zhvillimor.
Leave a Reply