Kryetarja e Kuvendit, Elisa Spiropali, ka bërë një thirrje për bashkëpunim dhe dialog politik, duke theksuar se procesi i integrimit evropian është një mision kombëtar që tejkalon ndasitë partiake. Në një deklaratë pas miratimit të raportit të Parlamentit Evropian për Shqipërinë, Spiropali vlerësoi mbështetjen e BE-së dhe kërkoi angazhim të përbashkët për të përshpejtuar reformat e nevojshme.
Ajo ftoi të gjithë deputetët, pavarësisht përkatësisë politike, që të angazhohen me më shumë dialog dhe transparencë, duke theksuar se përfituesit janë qytetarët dhe jo partitë.
“Kur vjen puna te BE-ja, Kuvendi ka një qëndrim të përbashkët, që është një prioritet kombëtar që tejkalon ndasitë politike. Kjo është një vlerë që duhet ta forcojmë në shërbim të qytetarëve. Angazhimi ynë nuk është vetëm politik, por një kalendar pune i dakordësuar me Komisionin Evropian. Raporti thekson nevojën e përshpejtimit të reformave, dhe kjo nuk ka të bëjë vetëm me qeverinë, por me çdo qelizë të pushtetit, shoqërinë civile, grupet e interesit dhe çdo qytetar të këtij vendi. BE-ja është destinacioni i vetëm i së ardhmes, dhe raporti ka adresuar një sërë sfidash që duhet t’i adresojmë sa më shpejt, përfshirë polarizimin politik, retorikën konfrontuese dhe nevojën për një dialog më konstruktiv dhe gjithëpërfshirës politik. Kuvendi ka një rol parësor në këtë rast. Bëj thirrje që puna me reformat duhet të bëhet këtu, brenda vendit, dhe të punojmë së bashku. Ftoj të gjithë deputetët të punojmë bashkë, me më shumë dialog dhe transparencë lidhur me atë që duhet të bëjmë, pasi nga kjo nuk humbet askush, por përfitojnë të gjithë. Nuk kemi asnjë minutë për të humbur në këtë mision kombëtar. Kontributi i gjithsecilit është i mirëpritur”, tha ajo.
Kryeparlamentarja nuk kurseu as akuzat për liderin e opozitës, i cili sipas saj, po nxin emrin e Shqipërisë me deklarata e rezoluta të pavërteta.
“Lidhur me një fenomen që është një njollë e zezë në diskursin politik shqiptar, dënoj me forcë përpjekjet e atyre që nuk po lënë gjë pa bërë e gur pa lëvizur për të njollosur vendin e tyre, vetëm për të shmangur përgjegjësinë. E kam fjalën për “misionarët” që, pasi kanë njollosur emrin e tyre, janë rikthyer me vrull për të dëmtuar emrin e Shqipërisë me hidhësinë e humbësit të keq, të sulur në përdhosjen e emrit të Shqipërisë brenda dhe jashtë vendit. Me akuza qesharake dhe të pavërteta, si një përpjekje e fundit për mbijetesë politike, kanë nisur pelegrinazhin që me një fletushkë të hartuar në Tiranë i shitet opinionit ndërkombëtar si “rezolutë” e kësaj apo asaj organizate. Tentativa të tilla të dëshpëruara dhe antikombëtare nuk i bëjnë dot ballë Shqipërisë evropiane, që ka hapur negociatat për katër grupkapitujt”, tha Spiropali.
Spiropali nënvizoi gjithashtu se rruga drejt Bashkimit Evropian është e vetmja alternativë për Shqipërinë dhe se raporti i PE e konfirmon progresin e bërë deri tani.
“Dje u konfirmua edhe një herë se Shqipëria mbetet një histori suksesi dhe një shembull në rajon. Raporti nënvizon angazhimin e qëndrueshëm të Shqipërisë ndaj reformave kyçe, përfshirë forcimin e shtetit të së drejtës, funksionimin e institucioneve të drejtësisë, mbrojtjen e të drejtave themelore dhe të pakicave, si dhe përparimin kundër korrupsionit dhe krimit të organizuar. Eurodeputetët vlerësojnë rolin konstruktiv të Shqipërisë në rajon dhe mbështetjen e palëkundur të politikës së jashtme të BE-së dhe bashkëpunimin në sfidat e përbashkëta. Ishte inkurajuese që eurodeputetët mbështetën objektivin për mbylljen e negociatave deri në vitin 2027’, tha ajo.
Në mbledhjen e posaçme të Komitetit të Punëve të Jashtme të Parlamentit Europian, që u mbajt me 4 qershor, 57 anëtarë votuan pro progres-raportit të vitit 2023-2024 të përpiluar nga Andreas Schieder, 11 kundërshtuan dhe 6 abstenuan. Komiteti i Punëve të Jashtme të PE vlerësoi angazhimin e palëkundur të Shqipërisë për anëtarësimin në BE. Eurodeputetët theksuan konsensusin e gjerë politik në Shqipëri dhe mbështetjen e fortë publike për anëtarësimin në BE, krahas përafrimit të plotë me politikën e jashtme dhe të sigurisë së BE-së.
Leave a Reply