Kryeministri i Shqipërisë, Edi Rama, ka reaguar me indinjatë pas kërkesës së Prokurorisë së Dhomave të Specializuara të Hagës që ish-krerët e UÇK-së, Hashim Thaçi, Kadri Veseli, Rexhep Selimi dhe Jakup Krasniqi, të dënohen me nga 45 vjet burg.
Rama ka thënë se nuk mund të shprehet menjëherë për këtë çështje, duke shtuar se po mundohet të kuptojë logjikën që ka ndjekur prokuroria për të dalë me këtë kërkesë. Ai ka shtuar se fjalët nuk i vijnë në ndihmë për t’u shprehur dhe se i duhet kohë për të përballuar gjithë atë që ka ndodhur.
“Më pyesin miq nga Prishtina pse nuk po shprehesh për mikun tënd që sot u ngarkua me 45 vjet burg në pretencën e prokurorisë së Hagës?! Nuk po shprehem dot, pasi ende po mundohem ta gjej ku buron filli logjik që ka ndjekur prokuroria për të dalë me kërkesën për varrosje për së gjalli të katër burrave dhe si kurrë ndonjëherë, fjalët nuk më vijnë në ndihmë për t’u shprehur… Ndjesë, më duhet kohë ta gëlltis gjithë atë mal me m*t që nxorri sot ajo prokurori në zemër të Europës demokratike!”, ka shkruar Rama në X.
Leave a Reply