Britania e Madhe do të ndihmojë Ukrainën të mbrohet më mirë nga sulmet ruse që shkatërrojnë infrastrukturën e saj energjetike, me një paketë prej rreth 500 milionë paundësh (575 milionë euro), njoftoi sot sekretari britanik i Mbrojtjes, John Healey. “Sot po njoftoj një ndihmë të re prej më shumë se gjysmë miliardi paundësh për mbrojtjen ajrore të Ukrainës”, tha ai gjatë mbërritjes në Bruksel, pak para një takimi të ministrave të Mbrojtjes të NATO-s.
Ministria britanike e Mbrojtjes bëri të ditur se rreth 150 milionë paund (172 milionë euro) do të përdoren për një skemë të NATO-s të mbështetur nga Donald Trump, për të blerë armë amerikane për Ukrainën. Londra gjithashtu do t’i dërgojë Ukrainës 1 000 raketa të vogla të prodhuara në Britaninë e Madhe, me një vlerë prej 390 milionë paundësh (448 milionë euro).
Healey ishte bashkëkryesues me homologun e tij gjerman, Boris Pistorius, një takim të ri sot të Grupit të Kontaktit midis Ukrainës dhe aleatëve të saj, ku i bëri thirrje këtyre të fundit të rrisin ndihmën. Në vitin 2025, ky grup kishte mbledhur rreth 45 miliardë dollarë ndihmë ushtarake për Ukrainën.
“Në 2026, duhet të bëjmë më mirë, duhet të bëjmë më shumë”, tha ministri britanik në fillim të takimit.
“Ndihma ushtarake e premtuar sot ka një ndikim të drejtpërdrejtë në vijën e frontit dhe në numrin e jetëve ukrainase të shpëtuara”, shtoi ai, pranë ministrit të ri ukrainas të Mbrojtjes, Mykhailo Fedorov.
Sulmet masive ruse ndaj rrjetit energjetik ukrainas kanë shkaktuar ndërprerje të ngrohjes dhe energjisë elektrike në zona të gjera të vendit gjatë dimrit të acartë.
Leave a Reply