Këshilli parlamentar për Rregulloren, Mandatet dhe Imunitetin nuk ka gjetur dakordësinë dhe do të dalë me 2 raporte për kërkesën e SPAK për arrestimin e zëvendëskryeministres Belinda Balluku. Pas një mbledhje disaorëshe, palët janë ndarë në qëndrime.
Kryetari i grupit parlamentar të Partisë Socialiste, Taulant Balla bëri të ditur Partia Socialiste dhe Partia Demokratike do t’i drejtohen Kuvendit me dy raporte për sa i përket kërkesës së Prokurorisë së Posaçme kundër Korrupsionit dhe Krimit të Organizuar, për dhënien e autorizimit për arrestimin e zv/kryeministres Belinda Balluku. Balla theksoi se Kuvendi ka marrë kohën e nevojshme për sa kohë u përfshi edhe Gjykata Kushtetuese në proces.
Ndërkohë Balla u shpreh se në mbledhjen e sotme pyetjet e të gjithë deputetëve ndaj të dyja palëve të përfaqësuara hodhën dritë mbi shumë çështje që lidhen me elementin thelbësor të Kushtetutës, prezumimin e pafajësisë. “Në përfundim të këtij procesi u pa se deputetët demokratë nuk kishin nevojë për shqyrtim, pasi e kishin gati vendimin e tyre. Ndërsa në emër të pesë deputetëve të PS-së, kam informuar Këshillin e Mandateve se sa i përket kërkesës për dhënien e menjëhershme të autorizimit ne nuk ishim dakord me mënyrën e propozuar”, tha Balla. Balla bëri të ditur se fillimisht do të informohet grupi parlamentar i PS-së, ndërsa shtoi se autorizimin nuk e jep Këshilli i Mandateve, por Kuvendi në seancë plenare.
Nga e tij kryetari i Grupit Parlamentar të Partisë Demokratike, Gazment Bardhi, tha se, prokurorët e #SPAK informuan se njerëzit e Ballukut, “të fortë” dhe pjesëtarë të kabinetit, kanë kërcënuar dhe u kanë ofruar para dëshmitarëve për të ndryshuar dëshmitë. Sipas tij, prokurorët kanë bërë me dije se pozita e Ballukut ndaj hetimit është rënduar dhe ajo rrezikon deri në 35 vite burg, në rast të provimit të fajësisë. PD ka kërkuar miratimin e kërkesës dhe heqjen e imunitetit të Ballukut.
Të 2 raportet për Ballukun do t’i paraqiten për shqyrtim Kuvendit.
Leave a Reply