Kryeministri sllovak, Robert Fico ndërpreu furnizimin emergjent me energji elektrike të vendit të tij për Ukrainën, mes një mosmarrëveshjeje mbi tranzitin e naftës ruse. Ky veprim vjen pas kërcënimeve të Fico për kundërmasa ndaj Ukrainës, ku rrjedha e naftës ruse në Sllovaki nëpërmjet tubacionit ”Druzhba” u ndërpre muajin e kaluar.
Kievi thotë se rrjedha u ndërpre për shkak të sulmeve ruse.
Në një video në Facebook, kryeministri sllovak tha se më parë i kishte kërkuar presidentit ukrainas, Volodymyr Zelensky një bisedë telefonike urgjente në lidhje me çështjen. Megjithatë, për shkak se Zelenski thuhet se nuk do të ishte i disponueshëm deri të mërkurën, Fico tha se ndihej “i detyruar të ndërmerrte veprime të menjëhershme reciproke”.
”Masa do të hiqet menjëherë sapo të rifillojë tranziti i naftës në Sllovaki”, tha Fico.
Me një gjatësi prej gati 9 000 kilometrash, tubacioni ”Druzhba” (”Miqësia”) del nga Rusia dhe shpërndahet në Bjellorusi në degë veriore dhe jugore, duke furnizuar rafineritë në Poloni, Gjermani, Ukrainë, Sllovaki, Hungari dhe Republikën Çeke.
Sipas burimeve ukrainase, ai ka ndaluar së funksionuari që nga fundi i janarit për shkak të bombardimeve ruse.
Leave a Reply