Kryeministri indian, Narendra Modi ka mbërritur sot në Izrael për një vizitë dyditore, udhëtimi i tij që nga fillimi i luftës në Rripin e Gazës. Modi pritet t’i drejtohet parlamentit izraelit, “Knesset”, dhe të zhvillojë takime me kryeministrin Benjamin Netanyahu dhe presidentin Isak Herzog. Në axhendën e tij nuk është parashikuar asnjë takim me udhëheqës palestinezë.
Vizita vjen në një kohë kur të dy vendet synojnë të forcojnë lidhjet në mbrojtje, teknologji dhe tregti – një marrëdhënie që është thelluar ndjeshëm që kur Modi erdhi në pushtet më shumë se një dekadë më parë. Megjithatë, analistët thonë se kjo vizitë do të vërë në provë edhe politikën e jashtme të Indisë, ndërsa përpiqet të balancojë marrëdhëniet me Izraelin dhe vendet e tjera të Lindjes së Mesme.
Në vitin 2017, Modi u bë kryeministri i parë indian që vizitoi Izraelin. Udhëtimi u pa gjerësisht si një pikë kthese në marrëdhëniet mes dy vendeve.
Të dy shtetet bashkëpunojnë ngushtë në luftën kundër terrorizmit dhe në fushën e mbrojtjes.
India është gjithashtu ndër blerësit më të mëdhenj të armëve izraelite.
Netanyahu e ka cilësuar vizitën e Modit si “historike”. “Lidhja mes Izraelit dhe Indisë është një aleancë e fuqishme mes dy liderëve globalë. Ne jemi partnerë në inovacion, siguri dhe kemi një vizion të përbashkët strategjik. Së bashku po ndërtojmë një bosht kombesh të përkushtuara ndaj stabilitetit dhe progresit,” shkroi Netanyahu në X.
“India e vlerëson thellësisht miqësinë e qëndrueshme me Izraelin, të ndërtuar mbi besim, inovacion dhe një angazhim të përbashkët për paqe dhe përparim”, u përgjigj Modi.
Leave a Reply