Emri i Murat Jasharit është përmendur për një periudhë të gjatë si kandidat i mundshëm për president të vendit, duke u konsideruar si figurë unifikuese për spektrin politik. Madje, këtë emër e ka përmendur edhe zëvendëskryeministri i parë dhe ministri i Punëve të Jashtme, Glauk Konjufca, gjatë ditëve të fundit.
Megjithatë, vetë familja Jashari nuk është shprehur e gatshme që emri i saj të përfshihet në kalkulime politike. Në një prononcim për “Vox Kosova”, Murat Jashari ka deklaruar se nuk është i interesuar të bëhet pjesë e pazareve politike, duke theksuar se familja Jashari u përket të gjithë shqiptarëve.
“Familja Jashari u takon të gjithë shqiptarëve, dhe të gjithë janë të tanët, pa dallim bindjeve politike apo besimeve, sepse sakrifica është bërë për ta… Por mes të qenit në pozita publike dhe profesionit që kam, unë zgjedh këtë të fundit”, ka thënë Jashari. Ai ka shtuar se postin e presidentit do ta pranonte vetëm në rrethana të jashtëzakonshme, si në rast të një rreziku madhor për vendin.
“Runa Zot, naj luftë civile, naj rrezik të madh kombëtar ku cenohet bërthama e kombit tonë, atëherë kush jam unë mos me sakrifiku për këtë vend, ama jo me e keqpërdorë emrin e familjes Jashari”, ka deklaruar Murat Jashari.
Ndërkohë, kryeministri i Albin Kurti ka vizituar së fundmi familjen Jashari, por nuk ka dhënë detaje lidhur me përmbajtjen e takimit.
Kurse ministri i Punëve të Jashtme, Glauk Konjufca, deklaroi të mërkurën se nëse një emër nga familja e heroit kombëtar Adem Jashari do të propozohej për president të Kosovës, kjo do të përbënte një “konsensus automatik” në shoqëri.
Deri më tani, asnjë parti politike nuk ka kundërshtuar publikisht mundësinë e kandidimit të ndonjë anëtari të familjes Jashari për postin e presidentit.
Leave a Reply