Zbulohen detaje të reja mbi takimin mes presidentit të Republikës, Bajram Begaj dhe kryeministrit Edi Rama, paraditen e së hënës në Pallatin e Brigadave. Ai që u paraqit si një takim rutinë për ndryshimet në qeveri duket se ka patur në fokus edhe ndryshimin në drejtimin e Shërbimit Informativ të Shtetit. Kryeministri Rama ka marrë tashmë një vendim, të pazyrtarizuar ende, për largimin e drejtueses aktuale të shërbimit inteligjent, Vlora Hyseni, por procesi i zëvendësimit të saj kërkon domosdoshmërisht bashkëpunimin e Kreut të Shtetit.
Në mungesë të një zëvendësdrejtori të përgjithshëm të SHISH-it, një largim i beftë i zonjës Hyseni mund ta fusë në një kolaps institucionin e rëndësishëm të sigurisë kombëtare dhe këtu merr një rëndësi jo të vogël roli i Presidentit të Republikës, i cili emëron si Drejtorin, ashtu edhe Zv/drejtorin e SHISH-it. Për rreth 30 muaj, Begaj dhe Rama nuk kanë patur dakordësi për të gjetur një numër dy të shërbimit inteligjent, por largimi, tashmë i vendosur i Hysenit, e fut procesin në një pikë delikate. Kjo për faktin se dekretimi, qoftë i një drejtuesi apo një zëvendësi të përkohshëm, kërkon një verifikim të thellë të figurës dhe sigurisht disa javë.
Të dy zyrat e shtypit, të Presidencës dhe Kryeministrisë, njoftuan mesditën e së hënës se takimi Begaj-Rama ishte i fokusuar te ndryshimi i disa ministrave. Shefi i mazhorancës e kishte vendosur të enjten e shkuar të bënte një seri ndryshimesh, mes të cilave, edhe largimin e zv/kryeministres Belinda Balluku.
“Sot, Presidenti i Republikës, Sh. T. Z. Bajram Begaj, priti në takim Kryeministrin, Sh. T. Z. Edi Rama. Kryeministri paraqiti në takim propozimet për ndryshimet në Kabinetin qeveritar. Procedura kushtetuese parashikon 7 ditë afat për dekretimin e ministrave”, bëri të ditur Presidenca. Ndërkohë Kryeministria njoftoi se “Kryeministri i Republikës së Shqipërisë, Edi Rama, zhvilloi një takim zyrtar me Presidentin e Republikës, Bajram Begaj. Gjatë takimit, Kryeministri paraqiti propozimet për ndryshimet në përbërjen e Kabinetit qeveritar, në përputhje me procedurat kushtetuese në fuqi”.
Por, sipas burimeve politike, takimi Begaj-Rama, ndonëse i shkurtër në kohë (rreth 35 minuta), nuk ka mbetur i fokusuar vetëm te dekretimi i pritshëm i ministrave, për të cilët në bisedë duket se ka patur jo shumë për të folur. Kreu i Shtetit mësohet se i ka premtuar Kryeministrit se do të përpiqet ta përfundojë procesin e dekretimit sa më shpejt, përfshirë verifikimin përkatës, në mënyrë që ministrat e rinj të miratohet në seancën e së enjtes së Kuvendit. Nga ana tjetër, Begaj mësohet të jetë zënë në befasi nga njoftimi i bërë nga kryeministri Rama se së shpejti duhet zyrtarizuar edhe largimi i Vlora Hysenit. Shefi i qeverisë e ka prezantuar si dëshirë të vetë Hysenit.
Leave a Reply