Kryeministri britanik, Keir Starmer ka mbrojtur qëndrimin e tij ndaj krizës me Iranin, pas kritikave të presidentit amerikan, Donald Trump dhe opozitës konservatore. “Situata në Lindjen e Mesme kërkon “qetësi dhe gjakftohtësi”. Prioriteti i qeverisë është mbrojtja e jetëve britanike dhe kthimi në atdhe i qytetarëve të bllokuar në rajon”, tha Starmer në Parlament. Starmer është kritikuar nga Trump për refuzimin fillestar për të lejuar përdorimin e bazave britanike në sulmet kundër Iranit.
Gjithashtu, qeveria është përballur me kritika për mosmbrojtjen e bazës ajrore “RAF Akrotiri” nga një sulm me dron. “Britania e Madhe tashmë ka dislokuar mjete ushtarake në rajon, përfshirë avionë luftarakë F-35. Kjo qeveri do të jetë e vendosur në fokusin e saj – mbrojtjen e jetëve britanike, kthimin e qytetarëve në shtëpi dhe ruajtjen e interesit kombëtar”, theksoi Starmer.
Ai tha se i gjithë vendi ishte i shqetësuar për përshkallëzimin e mundshëm të konfliktit dhe se vendimet duhej të merreshin “me qartësi, qëllim dhe gjakftohtësi”.
Fillimisht, SHBA-së iu mohua përdorimi i bazave britanike, përfshirë Diego Garcia në Oqeanin Indian dhe “RAF Fairford” në Gloucestershire, për kryerjen e sulmeve kundër regjimit iranian.
Trump deklaroi dje se nuk ishte i kënaqur me Britaninë e Madhe.
“Ky nuk është Winston Churchill me të cilin kemi të bëjmë”, tha presidenti amerikan.
“Nuk isha i përgatitur që Britania e Madhe të bashkohej me një luftë pa një bazë të ligjshme dhe një plan të zbatueshëm dhe të menduar mirë”, tha Starmer në Parlament.
Pas veprimeve hakmarrëse të Iranit, Starmer i dha SHBA-së leje të kufizuar për të përdorur bazat britanike, për të goditur lëshuesit e raketave dhe infrastrukturën ushtarake, por avionët e RAF nuk ishin përfshirë në sulme direkte.
Leave a Reply