Kryeministri Edi Rama, në fund të fjalës së tij në mbledhjen e Grupit Parlamentar të Partisë Socialiste, ku u prezantua raporti i pesë anëtareve të PS-së në Këshillin e Mandateve në lidhje me kërkesën e Prokurorisë së Posaçme, për dhënien e autorizimit për arrestim të deputetes dhe ish-zv/kryeministres Belinda Balluku, e falënderoi këtë të fundit për punën e besuar në gjashtë vite.
Rama tha se i uron Ballukut fatin që meriton në betejën ligjore, për të cilën do të ketë në krah vetëm avokatët e saj.
“I kërkoj ndjesë për refuzimet e përsëritura të tre dorëheqjeve të veta, të cilat, pavarësisht interesit të saj apo pikëpamjeve të disa shokëve këtu për të lehtësuar presionin mbi të apo mbi ne. I kam refuzuar pikërisht sepse drejtësia, pushteti i pavarur gjyqësor, u kuturis, pa ose me dashje, këtë do ta mësojmë dhe të jeni të sigurt që po e mësova do t’ua tregoj, në territorin e pavarësisë së pushtetit të pavarur ekzekutiv dhe legjislativ”, tha Rama.
Rama nënvizoi se pushteti buron nga vota e popullit.
“Dhe kjo, për mua, ishte dhe do të jetë e papranueshme sa të jem unë këtu në këtë detyrë. Besoj se isha po aq i qartë sa është i qartë edhe raporti i Këshillit të Mandateve, i shkruar nga pala jonë, por besoj se edhe në raportin tjetër të palës tjetër i keni të gjitha argumentet pse kjo kërkesë rrëzohet”, tha Rama.
Leave a Reply