Pas disa javësh negociatash të vështira, vendet anëtare të BE-së arritën një marrëveshje, në minutën e fundit, për të zgjatur sanksionet ndaj Rusisë, pas një kompromisi mbi sanksionimin e dy oligarkëve rusë. Marrëveshja parashikon që oligarkët e njohur rusë, Alisher Usmanov dhe Mikhail Fridman të mbeten për momentin nën masa ndëshkuese, pavarësisht kërkesave të Sllovakisë dhe Hungarisë për t’i hequr nga lista.
Megjithatë, sanksionet ndaj dy shtetasve rusë – së bashku me rreth 2 600 individë dhe organizata të tjera – do të zgjaten vetëm për gjashtë muaj, në vend të 12 muajve siç ishte planifikuar fillimisht.
Për më tepër, sanksionet ndaj dy individëve nuk do të rinovohen, pasi këshilli i vendeve anëtare tha se nuk kishte prova të mjaftueshme për mbështetjen e tyre ndaj luftës së Rusisë kundër Ukrainës. Emrat e tyre nuk janë zbuluar ende.
Sanksionet e BE-së zakonisht përfshijnë kufizime udhëtimi, ngrirje të pasurive dhe ndalime për fonde ose burime të tjera ekonomike të disponueshme.
Në shumicën e rasteve, sanksionet janë vendosur si përgjigje ndaj asaj që BE-ja e sheh si një luftë të padrejtë dhe të paarsyetuar të Rusisë ndaj Ukrainës, të cilën Moska e nisi më shumë se katër vjet më parë.
Të prekurit përfshijnë politikanë dhe zyrtarë të lartë rusë, si dhe disa biznesmenë me aktivitete tregtare në vendet e BE-së.
Leave a Reply