Irani, përpjekje për të goditur ishullin e avionëve amerikanë

Përpjekja e Iranit për të goditur bazën ushtarake amerikano-britanike në ishullin e çuditshëm Diego Garcia në Oqeanin Indian, rreth 4 mijë kilometër larg Teheranit, tenton të krijojë dy efekte të menjëhershme.

Së pari, efekti psikologjik lidhet me rrezen e rrezikut të fuqisë ushtarake të ajatollahëve dhe vendet e mundshme brenda saj, përfshirë shtete të Bashkimit Europian dhe #NATO-s. Synimi i Iranit mbetet shtimi i presionit ndaj qeverive, jo vetëm në Gjirin Persik, por edhe më tej, me kërcënimin e një lufte të zgjeruar dhe të zgjatur.

Së dyti, efekti praktik lidhet me mundësinë dhe nevojën e ushtrisë amerikane për ta përdorur atë rrip toke në mes të oqeanit, si një ndër të paktat pista, ku mund të ulen avionët gjigandë strategjikë. Një nga trajektoret e përdorura nga avionët e rëndë bombardues B-52 për të mbërritur në rajonin e Lindjes së Mesme është zhvendosja nga baza në Luiziana në Shtetet e Bashkuara, duke u drejtuar për në Oqeanin Paqësor, në ishullin e Guamit, që vlerësohet të jetë një ndalesë për të vijuar rrugën drejt Diego Garsias, ishullit në Oqeanin Indian. Pas Guamit, kjo është baza e dytë strategjike e bombarduesve amerikanë në rajonin e Indo-Paqësorit.

Edhe gjatë sulmit në qershor 2025 kundër #Iranit, strategët ushtarakë amerikanë zgjodhën zhvendosjen e disa avionëve drejt Guamit për të çorientuar Teheranin, teksa bombardues të tjerë kaluan Oqeanin Atlantik dhe Mesdheun për të goditur strukturat e ndërtimit të armëve bërthamore.