Kam kënaqësinë të raportoj se SHBA dhe Irani kanë pasur, gjatë dy ditëve të fundit, bisedime shumë të mira dhe produktive lidhur me një zgjidhje të plotë të armiqësive tona në Lindjen e Mesme, shkruan sot me germa kapitale në rrjetin Social Truth presidenti amerikan, Donald Trump. ”Bazuar në tonin e këtyre bisedimeve të thella, të detajuara dhe konstruktive, të cilat do të vazhdojnë gjatë gjithë javës, kam udhëzuar Departamentin e Luftës të shtyjë çdo sulm ushtarak kundër centraleve elektrike dhe infrastrukturës energjetike iraniane për një periudhë pesëditore, në varësi të suksesit të takimeve dhe diskutimeve në vazhdim. Faleminderit për vëmendjen tuaj ndaj kësaj çështje!”, mbyll shënimin e tij presidenti Trump.
Presidenti amerikan, Donald Trump tha sot se Shtetet e Bashkuara dhe Irani kanë arritur marrëveshje për rreth 15 pika të një marrëveshjeje të mundshme. “Ata kurrë nuk do të kenë një armë bërthamore. Ata kanë rënë dakord për këtë”, u tha Trump gazetarëve në Florida. Ai përsëriti një deklaratë të mëparshme se ishin zhvilluar bisedime “shumë të forta” me Iranin dhe tha se ka “pika kryesore marrëveshjeje, do të thoja, pothuajse të gjitha pikat e marrëveshjes”.
Trump tha se të dy palët ndoshta do të flisnin në telefon më vonë sot. Ai shtoi se SHBA-të nuk po negociojnë me udhëheqësin e ri suprem të vendit, Mojtaba Khamenei, por me personin që ai beson se është figura më e respektuar në Iran.
”Si Uashingtoni ashtu edhe Teherani duan të arrijnë një marrëveshje për t’i dhënë fund luftës”, theksoi presidenti amerikan.
Më parë të hënën, Trump shkroi në Truth Social se po e shtynte kërcënimin e tij për sulme ushtarake ndaj termocentraleve dhe infrastrukturës energjetike iraniane për pesë ditë për shkak të “bisedave produktive” me Iranin.
Megjithatë, Irani e hodhi poshtë me shpejtësi pretendimin e Trump se të dyja palët kanë qenë të angazhuara në negociata për t’i dhënë fund luftës së nisur nga SHBA-të dhe Izraeli.
Leave a Reply