NATO dhe Shtetet e Bashkuara kanë gjetur një marrëveshje që do të mundësojë zhbllokimin e dërgesave me armë amerikane për Ukrainën. Sipas Presidentit amerikan, Donald Trump, do të jetë Aleanca Transatlantike që do të paguajë për armët, që do të nisen nga SHBA drejt Ukrainës.
Këto dërgesa ishin bllokuar disa ditë më parë nga Pentagoni. Sipas marrëveshjes së re, armatimi amerikan, përfshirë edhe sistemet “Patriot”, do të dërgohen nga SHBA për NATO-n dhe më pas do të jetë Aleanca që do të bëjë shpërndarjen.
Gjithashtu, një zëdhënës i NATO-s bëri të ditur se Aleatët po punojnë intensivisht për të siguruar që Ukraina të ketë mbështetjen e duhur për të përballuar agresionin rus. “Kjo përfshin edhe përpjekje urgjente për të siguruar furnizime nga Shtetet e Bashkuara, përfshirë mbrojtjen ajrore dhe armatimin”, u shpreh zëdhënësi i NATO-s.
Bateritë “Patriot” janë një sistem raketash tokë-ajër, që vende të ndryshme i kishin porositur për t’i blerë në Shtetet e Bashkuara. Tashmë në bazë të marrëveshjes SHBA-NATO, vendet që do të marrin sistemin “Patriot” do të kenë mundësi ta transferojnë atë drejt Ukrainës.
