EKSKLUZIVE/ Mbaron mandati i Shefit të Shtabit të Përgjithshëm

Mandati i Shefit të Shtabit të Përgjithshëm të Forcave të Armatosura, gjeneral-lejtnant, Arben Kingji, ka përfunduar prej një jave, ndërsa ende nuk është publikuar dekreti i Presidentit të Republikës për rikonfirmimin apo zëvendësimin e tij me një nga ushtarakët e lartë.

Mandati i Kingjit në krye të Forcave të Armatosura ka përfunduar më 2 gusht 2025, pasi ai është emëruar më 2 gusht 2022. Me dekretin 13840, Presidenti i Republikës, Bajram Begaj, ka emëruar si pasues të tij në detyrën e shefit të Shtabit të Përgjithshëm, gjeneral brigade, Arben Kingji. Vetëm një vit më pas, Kreu i Shtetit ka firmosur një tjetër dekret për Kingjin, duke i dhënë atij gradën e lartë “gjeneral major”. Ndërsa, në nëntor 2024, Presidenti i Republikës ka dekretuar dhënien e gradës “gjeneral lejtnant” për Kingjin.

Pikërisht pajisja e Arben Kingjit me gradat më të larta në Forcat e Armatosura duket se do ta dërgojnë atë drejt një mandati të dytë në krye të ushtrisë shqiptare, megjithatë për këtë nuk ka ende një konfirmim zyrtar.

Në bazë të ligjit “Për pushtetet dhe autoritetet e komandimit të Forcave të Armatosura të Republikës së Shqipërisë”, Presidenti i Republikës, mbështetur në nenin 9, “emëron, gradon, shkarkon dhe nxjerr në rezervë ose në lirim, me propozimin e Kryeministrit, Shefin e Shtabit të Përgjithshëm të Forcave të Armatosura”.

I njëjti ligj, në nenin 15, përcakton se, “Shefi i Shtabit të Përgjithshëm të Forcave të Armatosura përgjigjet përpara Presidentit të Republikës, Kryeministrit dhe Ministrit të Mbrojtjes për drejtimin e veprimtarisë së Forcave të Armatosura”. Shefi i Shtabit të Përgjithshëm të Forcave të Armatosura është autoriteti më i lartë ushtarak në gradë dhe në hierarkinë e drejtimit e të komandimit strategjik në Forcat e Armatosura të Republikës së Shqipërisë.

Ligji përcakton se Shefi i Shtabit të Përgjithshëm të Forcave të Armatosura përzgjidhet nga radhët e oficerëve me grada madhore të Forcave të Armatosura, në bazë të aftësive profesionale dhe të përvojës. Shefi i Shtabit të Përgjithshëm të Forcave të Armatosura, me marrjen e detyrës, bën
betimin para Presidentit të Republikës. “Shefi i Shtabit të Përgjithshëm të Forcave të Armatosura shërben për një periudhë prej tre vjetësh, me të drejtë riemërimi vetëm për një mandat tjetër”, thuhet në ligj.