Erik Uendt, një ish-gjeneral propozohet si ambasador i SHBA në Tiranë

Gjeneral-lejtnanti në pension, Erik Uendt (Eric Wendt), nga Kalifornia, është propozuar nga Shtëpia e Bardhë si Ambasador i Jashtëzakonshëm dhe Fuqiplotë i Shteteve të Bashkuara të Amerikës në Republikën e Shqipërisë.

Njoftimi u bë nga Shtëpia e Bardhë. Nëse do të kalojë procedurat dhe votimin në Senatin Amerikan, Erik Uendt do të jetë pasardhësi i ambasadores Juri Kim, e cila u largua nga Shqipëria në vitin 2023.

Dy vite më parë, emërimi i diplomatit David J. Kostelancik për postin e Ambasadorit amerikan në Shqipëri, u rikthye në Shtëpinë e Bardhë, pasi Senati gjatë sesionit që u mbyll në fund të 2023 nuk futi në rend dite brenda afateve.

Uendt ka shërbyer si oficer aktiv në Ushtrinë Amerikane që nga viti 1986. Që nga viti 1991 është pjesë e forcave speciale si “Beretat Jeshile”, duke ndërtuar një profil të fortë si oficer i operacioneve speciale. Pas sulmeve të 11 shtatorit, ai ka marrë pjesë në disa misione të rëndësishme ndërkombëtare. Ka shërbyer në Indonezi si drejtues ekipi për Komandën e Paqësorit të SHBA-së, si dhe në disa operacione ushtarake, përfshirë operacionin “Liria e Qëndrueshme” në Filipine, operacionin “Liria e Irakut” në Irak dhe operacionin “Liria e Qëndrueshme” në Afganistan.

Përveç detyrave të shumta në struktura drejtuese, ai ka mbajtur edhe pozicione të rëndësishme, përfshirë rolin si ndihmës ushtarak kryesor i Sekretarit amerikan të Mbrojtjes. Wendt ka komanduar në të gjitha nivelet e forcave speciale, nga njësitë operative të vogla deri te komandat e mëdha rajonale të operacioneve speciale.

Ai flet gjuhën arabe dhe koreane dhe është vlerësuar me një sërë dekoratash ndërkombëtare dhe ushtarake, përfshirë Kryqin e Artë të Nderit të Gjermanisë (për shërbimin në Afganistan), vlerësim presidencial nga Filipinet dhe medalje nga Koreja e Jugut, si dhe disa insigna elitare si distinktivi i sulmeve ajrore, ai i parashutistit të avancuar, distinktivi “Ranger”, ai i forcave speciale dhe ai i këmbësorisë luftarake.

Në nëntor 2017, ai mori detyrën si Koordinator i Sigurisë i Shteteve të Bashkuara për Izraelin dhe Autoritetin Palestinez, duke luajtur një rol kyç në koordinimin e çështjeve të sigurisë në rajon.