Duke iu referuar mandatit të marrë nga votuesit, kryeministri i zgjedhur i Hungarisë, Peter Magjar tha se disa zyrtarë të lartë shtetërorë duhet të japin dorëheqje deri më 31 maj ose do të përballen me shkarkim nga detyra. “Deri më 31 maj, kukullat e Orbanit mund të largohen vullnetarisht nga pozicionet e tyre”, tha Magjar, i cili fitoi një shumicë dërrmuese në zgjedhjet e 12 prillit, në rrjetin social të kompanisë amerikane X, duke iu referuar besnikëve të Viktor Orbanit, i cili humbi pushtetin pas 16 vitesh.
Ai tha se thirrja vlen për presidentin, drejtuesit e Curia-s, që është autoriteti më i lartë gjyqësor në vend, Zyrën Kombëtare për Gjyqësorin, Gjykatën Kushtetuese si dhe prokurorin e përgjithshëm.
Magjar shtoi se më 12 prill votuesit mbështetën atë që e përshkroi si një “transformim të plotë politik”.
“Nëse këta zyrtarë nuk japin dorëheqje vullnetarisht deri më 31 maj, atëherë, mbi bazën e mandatit të marrë nga miliona hungarezë, ne do t’i largojmë ata nga detyra”, theksoi ai.
Magyar nuk dha detaje të mëtejshme se si do të zbatohen këto shkarkime. Ai më herët tha se shpreson të bëjë betimin më 9 ose 10 maj, në varësi të vendimit të presidentit për kohën e mbledhjes së parlamentit.
Leave a Reply