Presidenti rus Vladimir Putin i ka garantuar Teheranit mbështetjen e vazhdueshme të Moskës, gjatë një takimi me ministrin e Jashtëm të Iranit, Abbas Araghchi, në Shën Peterburg. Duke folur në Bibliotekën Presidenciale në qytetin rus, Putini tha se kishte marrë një mesazh nga udhëheqja iraniane javën e kaluar, dhe rikonfirmoi se Rusia dhe Irani do të vijojnë partneritetin e tyre strategjik, sipas agjencisë së lajmeve “Interfax”.
Araghchi deklaroi se marrëdhëniet mes Teheranit dhe Moskës ndodhen në nivelin më të lartë dhe pritet të forcohen më tej. Ai falënderoi Rusinë për mbështetjen e saj. Putini gjithashtu shprehu besimin për një paqe të shpejtë në rajon.
“Do të bëjmë gjithçka, që i shërben interesave të Iranit dhe interesave të të gjithë popujve në rajon, në mënyrë që paqja të arrihet sa më shpejt”, tha presidenti rus. Zëdhënësi i Kremlinit, Dmitry Peskov, deklaroi se rikthimi i armiqësive në shkallë të gjerë nuk ishte në interes, as të Teheranit dhe as të ekonomisë globale.
“Rusia është e gatshme të luajë një rol ndërmjetësues në konflikt”, shtoi ai.
Më herët, Araghchi vizitoi Islamabadin për të përcjellë kushtet e Teheranit për përfundimin e luftës me Shtetet e Bashkuara të Amerikës – përmes ndërmjetësimit pakistanez.
Aktualisht nuk ka negociata të drejtpërdrejta mes palëve.
Rusia konsiderohet aleate e Iranit, por nuk ka ofruar mbështetje ushtarake të hapur.
Leave a Reply