Kroacia dhe Bosnje-Hercegovina nënshkruan në Dubrovnik një marrëveshje për ndërtimin e një interkonektori të rëndësishëm gazi, të mbështetur nga Shtetet e Bashkuara të Amerikës, i cili pritet t’i mundësojë Sarajevës të ulë varësinë energjetike nga Rusia, furnizuesi i vetëm aktual i gazit për vendin, njoftoi kryeministrja bosnjake, Borjana Krishto.
Ky gazsjellës, i quajtur Interkoneksioni Jugor i Gazit, do të lidhë rrjetin boshnjak me një terminal të gazit natyror të lëngshëm (GNL) në ishullin Kërk në Kroaci, ku mbërrijnë sasi të konsiderueshme gazi amerikan si dhe me rrjetin evropian. Shtetet e Bashkuara, të cilat kanë intensifikuar përpjekjet diplomatike kohët e fundit për të përshpejtuar këtë projekt, furnizojnë me sasi të konsiderueshme gazi terminalin e Kërkut, në ishullin verior të Adriatikut kroat.
Në BH kjo ndërlidhje është pjesë e një projekti më të gjerë energjetik, me vlerë rreth 1,5 miliardë dollarë (1,3 miliardë euro), i cili parashikon ndërtimin e një rrjeti prej rreth 200 kilometrash gazsjellësish, së bashku me disa termocentrale që funksionojnë me gaz.
Projekti do të zbatohet nga kompania amerikane “AAFS Infrastructure and Energy”, e drejtuar nga Joseph Flynn, vëllai i gjeneralit Michael Flynn, këshilltar për sigurinë kombëtare gjatë mandatit të parë të Donald Trump, si dhe nga Jesse Binnall, ish-avokat i presidentit amerikan.
Organizatat mjedisore, që kundërshtojnë zhvillimin e sektorit të energjive fosile, e kanë kritikuar projektin, në një vend ku rreth dy të tretat e nevojave për energji elektrike mbulohen nga termocentralet me qymyr.
Ndotja e ajrit, veçanërisht gjatë dimrit, prek shumicën e qyteteve të mëdha.
Leave a Reply