Mbreti Çarls III dhe mbretëresha Kamilla mbërritën sot në Shtëpinë e Bardhë, në ditën e dytë të vizitës së tyre shtetërore në SHBA. Ata u pritën nga presidenti amerikan, Donald Trump dhe Zonja e Parë Melania Trump.
Në fjalën e tij, Trump theksoi marrëdhëniet e ngushta mes SHBA-së dhe Britanisë së Madhe, duke i cilësuar britanikët si “miqtë më të afërt” të amerikanëve. Ai iu referua gjithashtu një peme të mbjellë nga mbretëresha Elizabeth II gjatë një vizite të mëparshme në Shtëpinë e Bardhë, duke e përshkruar atë një simbol të gjallë të lidhjes shekullore mes dy kombeve.
Sipas Trump, fakti që pema është trefishuar në madhësi dhe forcë pasqyron zhvillimin e marrëdhënieve dypalëshe, duke shtuar se ajo “u mboll nga duar britanike në një tokë amerikane”. Ai nënvizoi se, që nga pavarësia e SHBA-së, “amerikanët nuk kanë pasur miq më të afërt se britanikët”.
Në përfundim të fjalës së tij, presidenti amerikan bëri edhe një shaka, duke thënë se nëna e tij, e lindur në Skoci, kishte pasur dikur një “simpati” për mbretin gjatë kohës kur ai ishte princ. Trump rikujtoi gjithashtu historinë e bashkëpunimit mes dy vendeve, duke përmendur takimin e Winston Churchill dhe Franklin D Roosevelt në Atlantikun e Veriut gjatë Luftës së Dytë Botërore, ku u hodh vizioni për një botë të lirë pas luftës.
“Ky mirëkuptim për lidhjen unike të kombeve tona dhe rolin e tyre në histori është thelbi i marrëdhënies sonë të veçantë dhe shpresojmë që të mbetet gjithmonë i tillë”, tha Trump.
Leave a Reply