Bashkimi Evropian i vlerëson të papranueshme deklaratat e kreut të PD, Sali Berisha, drejtuar ambasadorit të BE-së në Tiranë, Silvio Gonzato. Në një postim në rrjetet sociale, Ambasada e BE-së në Tiranë publikon mesazhin e një zëdhënësi të BE-së.
“Një zëdhënës i Bashkimit Evropian reagoi ndaj sulmeve personale kundër ambasadorit të BE-së, Silvio Gonzato, në Ditën e Evropës: ‘Deklarata të tilla janë të papranueshme. BE-ja dënon me forcë sulmet personale të bëra në Ditën e Evropës ndaj ambasadorit të Bashkimit Evropian në Shqipëri.
Ambasadori i BE-së ka vepruar në çdo kohë me profesionalizëm dhe integritet të plotë. Ne kemi besim të plotë tek ai dhe puna e tij’.”
Ky mesazh i publikuar nga Ambasada e BE në Tiranë vjen një ditë pasi kryetari i Partisë Demokratike, Sali Berisha, akuzoi kryediplomatin e Bashkimit Europian në Tiranë, duke e akuzuar se sipas tij sillet si ambasador i kryeministrit Edi Rama.
“Ky zotëri, në mënyrë të pretenduar, ka transmetuar në Bruksel trillimet më të pavërteta ndaj opozitës, sikur ne nuk jemi për integrimin. Për të mos treguar shumë gjëra të tjera”, deklaroi Berisha.
Leave a Reply