Studentët shqiptarë në Maqedoninë e Veriut dolën në protestë në Shkup për të kërkuar ”dhënien e provimit të jurisprudencës në gjuhën shqipe”. ”Jemi në protestë paqësore. Kemi dalë të protestojmë në mënyrë paqësore, por po provokohemi gjatë rrugës. Sapo mora lajmin se tre studentë janë arrestuar. Sot nuk kam ardhur të flas me ata. Sot kam ardhur të flas me ju”, deklaroi organizatori i protestës, Mevlan Ademi.
”Sa kohë duhet të presim që, në qytetin e tij, një shqiptar të flasë shqip? Sa kohë duhet të presim që të jemi qytetarë të barabartë në këtë vend? Ne këtu jemi autoktonë”, theksoi ai. Edhe organizatori tjetër, Jon Selimi, në fjalimin e tij para protestuesve tha se të rinjtë shqiptarë nuk do të heqin dorë nga kërkesat për të drejta të barabarta dhe përdorimin e gjuhës shqipe.
”Sot nuk jemi mbledhur këtu për t’u ankuar. Jemi këtu për të kujtuar se të drejtat që fitohen me mund nuk falen e as nuk harrohen. Sot jemi para jush me një mesazh të qartë. Jemi rikthyer këtu për t’ju thënë se gati jemi për të drejtat tona”, deklaroi Selimi. ”Gjeneratat ndryshojnë, por idealet jo. Nëse duhet t’ju dëshmojmë se vullneti ynë është i palëkundshëm, ne nuk lodhemi. Sot u drodh i gjithë Shkupi. Heshtja nuk është më opsion”, theksoi ai.
Protesta u përkrah edhe nga qytetarë të qyteteve të ndryshme të Maqedonisë si dhe nga studentë nga Kosova dhe Shqipëria.
”Jemi një grup nga Kosova. Studentët e Kosovës i bashkëngjiten protestës së Maqedonisë së Veriut. Jemi vetëm për qëllim solidariteti me studentët e Maqedonisë së Veriut”, tha një student nga Kosova.
Leave a Reply