Zëdhënësi i Ministrisë së Jashtme të Iranit, Esmaeil Baghaei deklaroi se nuk është finalizuar ende një marrëveshje mes Teheranit dhe Uashingtonit, pavarësisht kontakteve të vazhdueshme mes palëve. Baghaei tha për televizionin shtetëror iranian se “shkëmbimi i mesazheve po vazhdon, por nuk është arritur ende një mirëkuptim përfundimtar”, duke theksuar se bisedimet mes dy vendeve mbeten të hapura.
Deklarata e tij vjen pasi presidenti amerikan Donald Trump tha se po zhvillonte konsultime në “Situation Room” të Shtëpisë së Bardhë për të vendosur nëse do të miratonte një marrëveshje me Iranin. Sipas raportimeve, palët kishin arritur një marrëveshje paraprake që parashikonte hapjen e Ngushticës së Hormuzit dhe një periudhë 60-ditore negociatash për programin bërthamor iranian, por dokumenti pritet ende për miratimin përfundimtar të Trump.
Trump deklaroi më herët se çdo marrëveshje do të kërkonte që, Irani të heqë dorë plotësisht nga armët bërthamore dhe që Ngushtica e Hormuzit të hapet menjëherë pa tarifa apo kufizime për kalimin e anijeve.
Nga ana e tij, Baghaei tha se e ardhmja e Ngushticës së Hormuzit do të varet nga Irani dhe Omani, të cilat sipas tij po punojnë për krijimin e mekanizmave, që garantojnë sigurinë dhe kalimin e lirë të anijeve në këtë korridor strategjik detar.
Leave a Reply