Presidenti libanez, Joseph Aoun, deklaroi se synon të vazhdojë bisedimet me qeverinë e Israelit pavarësisht tensioneve në rritje mes Izraelit dhe lëvizjes shiite Hezbollah. “Negociatat janë më të sigurta se lufta”, tha Aoun para një komiteti përfaqësuesish të sektorit privat libanez, duke pranuar se bisedimet nuk do të sjellin rezultate të menjëhershme.
Aoun akuzoi Izraelin se nuk po respekton plotësisht marrëveshjen e armëpushimit të arritur në prill. Sipas marrëveshjes, Izraeli duhej të tërhiqej nga pesë pozicione që vazhdon të mbajë në jug të Libanit. Në vend të kësaj, sipas tij, ushtria izraelite ka vazhduar operacionet ushtarake dhe bombardimet e qyteteve nën justifikimin e vetëmbrojtjes.
Përfaqësues të Izraelit dhe Libanit pritet të takohen nesër në Uashington për bisedime të drejtpërdrejta me synimin për t’i dhënë fund luftimeve, megjithëse Hezbollahu nuk do të marrë pjesë në këto negociata.
Deklaratat e Aoun erdhën pasi tetë persona u vranë dhe 19 të tjerë u plagosën nga një sulm gjatë natës në jug të Libanit, sipas agjencisë shtetërore NNA. Ndërkohë, zyra e kryeministrit izraelit, Benjamin Netanyahu, njoftoi sulme të reja kundër objektivave të Hezbollahut në periferitë jugore të Bejrutit. Netanyahu dhe ministri i Mbrojtjes, Israel Katz, deklaruan se sulmet erdhën si përgjigje ndaj “shkeljeve të përsëritura dhe të vazhdueshme të armëpushimit” nga Hezbollahu.
Leave a Reply