Për të katërtën ditë radhazi grupime të shoqërisë civile protestuan në Tiranë lidhur me projektin për investim në Zvërnec të Vlorës, duke kërkuar edhe dorëheqjen e kryeministrit Edi Rama.
Qytetarët u grumbulluan në sheshin “Skënderbej” dhe nga aty marshuan drejt Kryeministrisë. Me pankarta në duar qytetarët kërkuan anulimin e projektit, duke shprehur shqetësimet e tyre për ndikimin që ai mund të ketë në mjedis dhe në pasuritë natyrore të zonës.
Gjatë marshimit përgjatë bulevardit në drejtim të Kryeministrisë, protestuesit u përplasën me policinë e cila kishte krijuar një barrierë mbrojtëse, në kuadër të masave të ndërmarra për zhvillimin e ndeshjes miqësore Shqipëri-Izrael. Pas disa minutash përplasje, policia hapi rrugën për protestuesit të cilët më pas ndaluan para Kryeministrisë.
Protestuesit kanë paraqitur pesë pika për qeverinë: Dorëheqjen e kryeministrit; Shfuqizimin e statusit dhe të kuadrit ligjor që lidhet me investitorët strategjikë; Shfuqizimin e Paketës së Maleve; Anulimin e ndryshimeve në Ligjin për Zonat e Mbrojtura; Anulimin e ndryshimeve në Ligjin për Trashëgiminë Kulturore.
Leave a Reply