Përfaqësues të shoqërisë civile dhe qytetarë të ndryshëm zhvilluan të shtunën, për të shtatën ditë me radhë, protestën kundër investimit në Zvërnec të Vlorës, duke kërkuar edhe dorëheqjen e kryeministrit Edi Rama.
Fillimisht qytetarët u grumbulluan në sheshin “Skënderbej” për të vijuar më pas marshimin përgjatë bulevardit “Dëshmorët e Kombit” drejt Kryeministrisë. Me flamuj në duar dhe pankarta kundër ndërtimit të resortit në Zvërnec, protestuesit kërkojnë anulimin e projekteve të dyshimta, mbrojtjen e pasurive kombëtare dhe dorëheqjen e kryeministrit Edi Rama.
Në foltoren e vendosur para godinës së kryeministrisë qytetarë dhe aktivistë po marrin fjalën për të shprehur revoltën e tyre kundër investimit.
“Jemi për Shqipërinë dhe jo për partitë politike”, u shpreh njëri prej protestuesve që mori fjalën. “Ne duam që Shqipëria të zhvillohet, nuk jemi kundër investimeve. Por nuk duam që Shqipëria të shitet, duam transparencë”, tha një tjetër qytetare.
Protestuesve iu adresua edhe një qytetar i ardhur nga Prishtina, i cili u kërkoi të mos tërhiqen se do të fitojnë. “Kosova është me ju, Kosova është me nënën Shqipëri”, tha i riu.
Një tjetër protestuese u bëri thirrje intelektualëve që t’i bashkohet protestës së të rinjve dhe të mos i lënë vetëm si në vitin 2018. Ajo tha se të rinjtë i kanë dhënë shpresë Shqipërisë.
Leave a Reply