Në Tiranë u zhvillua protesta e gjashtëmbëdhjetë kundër investimit të planifikuar në Zvërnec të Vlorës, ku qytetarë dhe aktivistë nga shoqëria civile dhe parti politike, u grumbulluan në sheshin “Skënderbej” për të marshuar përgjatë bulevardit drejt Kryeministrisë. Protestuesit ngritën pankarta dhe artikuluan thirrje që lidhen jo vetëm me kundërshtimin e projektit në Zvërnec, por edhe me çështje të tjera politike dhe shoqërore. Ata kërkuan dorëheqjen e Kryeministrit Edi Rama, largimin e Sali Berishës nga drejtimi i opozitës, hetimin e pasurive të politikanëve, si dhe kundërshtuan atë që e cilësuan si shitje të pasurive kombëtare.
Gjatë marshimit, pjesëmarrësit vendosën theksin te mbrojtja e natyrës dhe e pasurive publike, duke e lidhur kauzën e tyre me nevojën për më shumë transparencë dhe përgjegjshmëri nga institucionet. “Shqipëria e shqiptarëve, jo e tradhtarëve”, “Shqipëri e re”, “Nesër më shumë” dhe “Pa rini nuk ka Shqipëri” ishin disa nga sloganet që u dëgjuan në kor nga protestuesit përgjatë bulevardit.
Gjatë fjalës së tij kur qytetarët po grumbulloheshin në sheshin “Skënderbej”, aktivisti Alben Kola tha se cilët janë organizatorët. “Tre personat nismëtarë jemi: Luçiana Kokaj nga Rrjolli, Alben Kola nga Kukësi dhe Arlinda Lleshi nga Lezha”. Ai kërkoi nga protestuesit që marshimi të jetë brenda unazës së Tiranës, duke u kufizuar tek Zogu i Zi, 21 Dhjetori, sheshi “Wilson”, dhe “Bërryli”, “Farmacia 10” dhe “Ish-Treni”. Ai tha se protesta do të jetë paqësore dhe nuk do të ketë bllokim të aksit për në Aeroport. “Nuk i bllokojmë ne turistët, nuk bllokojmë aeroportin nga ku vijnë vëllezërit dhe motrat tona nga diaspora. Ne duam vetëm largimin e kësaj klase politike”, tha ai.
Në sheshin përpara Kryeministrisë, në një podium të improvizuar, një ish-minator në minierat e Valiasit u bëri thirrje edhe prindërve të të rinjve që t’i bashkohen protestës. “Më bëhet zemra mal që shoh gjithë këto njerëz. Kam protestuar si ish-minator. Në ‘90-ën kur ne bëmë protesta na erdhën prindërit dhe na mbështetën, u bëj thirrje prindërve që të vijnë t’u bashkohen fëmijëve, mos t’i lënë vetëm”, tha ai.
Një tjetër protestuese tha se establishmenti politik po e fal Shqipërinë, ndërsa kërkoi dorëheqjen e Kryeministrit dhe drejtuesit të opozitës.
Leave a Reply