Tre ditë pas përkujtimit të bombardimit të Hiroshimës, Japonia përkujton 81-vjetorin e bombardimit atomik të Nagasakit, i cili ndodhi në mëngjesin e 9 gushtit 1945. Në orën 11:02 me orën lokale pikërisht në momentin kur ndodhi shpërthimi, qyteti mbajti një minutë heshtje në Parkun e Paqes, ku u zhvillua ceremonia përkujtimore, në prani të kryeministres Sanae Takaichi dhe përfaqësuesve të 98 vendeve.
Bomba me plutonium, e mbiquajtur “Fat Man”, shkaktoi vdekjen e rreth 74 mijë njerëzve. Shumë prej të mbijetuarve, të njohur si hibakusha, më vonë vuajtën nga sëmundje të ndryshme dhe tumore të lidhura me ekspozimin ndaj rrezatimit.
Kryetari i bashkisë së Nagasakit, Shiro Suzuki, dorëzoi listën e përditësuar të viktimave, e cila tani përmban 204.708 emra, përfshirë 2.773 persona që kanë ndërruar jetë gjatë vitit të fundit.
Në “Deklaratën e Paqes”, Suzuki i cilësoi armët bërthamore jo si një “e keqe e domosdoshme”, por si një “e keqe absolute”, të papajtueshme me njerëzimin.
Ai kritikoi gjithashtu konceptin e parandalimit bërthamor, duke e cilësuar atë si “jashtëzakonisht të rrezikshëm dhe të brishtë”. Kryebashkiaku kujtoi gjithashtu dështimin, majin e kaluar, të konferencës së rishikimit të Traktatit për Mospërhapjen e Armëve Bërthamore dhe i kërkoi Tokios të marrë pjesë në kongresin për Traktatin për Ndalimin e Armëve Bërthamore, i planifikuar për në nëntor.
Leave a Reply