Kryeministri Edi Rama dhe Prokuroria e Shkodrës patën sot (e hënë) një përplasje publike lidhur me një ndërtim në zonën turistike të Thethit, që qeveria nisi ta shembë, duke e cilësuar në shkelje të ligjeve.
Kryeministri paralajmëroi një denoncim zyrtar ndaj prokurores që, sipas tij, ka lejuar vijimin e ndërtimeve të paligjshme në zonën e mbrojtur të Thethit. Ai e cilësoi situatën si një skandal dhe tha se Ministria e Drejtësisë është në proces përgatitjeje të dokumentacionit për ta dërguar çështjen në Këshillin e Lartë të Prokurorisë. “Ministria e Drejtësisë po përgatit denoncimin e skandalit ‘Gjeli’ në Këshillin e Lartë të Prokurorisë,” deklaroi Rama, referuar mbiemrit të prokurores.
Kryeministri theksoi se ndërtuesi që ka kryer veprimtari të jashtëligjshme në këtë zonë do të përballet me drejtësinë, ndërsa shteti do të ndërhyjë për të shembur të gjitha ndërtimet pa leje dhe për të rikthyer Thethin në gjendjen e tij natyrore. “Natyrisht që të gjitha kabinat e “fshatit turistik” të kriminelit që plagosi Thethin do i marrë shteti dhe skuadra e Bashkisë Shkodër nuk do të largohet nga Thethi pa e shëruar zemrën e qytezës magjike, ndërkohë që Ministria e Drejtësisë po përgatit denoncimin e skandalit “Gjeli” në Këshillin e Lartë të Prokurorisë”, tha Rama.
Nga ana e saj, Prokuroria e Shkodrës i doli në mbrojtje prokurores dhe vuri në dukje se ishin institucionet në varësi të qeverisë, Policia dhe Bashkia Shkodër, që e kishin referuar çështjen si kundërvajtje dhe jo si vepër penale. “Vetë Policia, në procesverbalin e këqyrjes së vendit të ngjarjes është shprehur se kontenierët nuk janë vendosur mbi bazamente betoni, por kanë qenë të vendosur mbi rrasa guri të prera,” deklaroi organi i akuzës. “Vetë IMT, Bashkia Shkodër, në shkresën e saj drejtuar Policisë Gjyqësore, e ka klasifikuar faktin si kundërvajtje administrative, jo si vepër penale,” shkruhet në reagimin e Prokurorisë.
Prokuroria më tej la të kuptohej se komentet publike të Ramës perceptoheshin si presion dhe dëmtonin besimin e publikut te drejtësia.
“Çdo shqetësim institucional duhet të adresohet përmes rrugëve të përcaktuara ligjore, dhe jo përmes mesazheve politike publike që synojnë t’i imponohen sistemit të drejtësisë,” thuhet në reagim. Prokuroria thotë se shteti i së drejtës nuk mund të funksionojë nëse prokurori frikësohet për çdo vendimmarrje të ligjshme.
