Gjermania ka akuzuar Rusinë për një sulm kibernetik ndaj sistemit të saj të kontrollit të trafikut ajror dhe një fushate për të destabilizuar zgjedhjet e fundit gjermane duke thirrur për këtë ambasadorin rus në Berlin.
”Sipas Ministrisë së Jashtme, shërbimi ushtarak rus GRU është përgjegjës për këtë sulm kibernetik të kryer në gusht 2024 ndaj sigurisë ajrore gjermane, për të cilin Berlini akuzoi qartë grupin e hakerëve APT28, i njohur gjithashtu si Fancy Bear”, tha një zëdhënës i ministrisë në një konferencë për shtyp.
”Sot mund të konfirmojmë në mënyrë formale se Rusia përmes fushatës Storm 1516 ka tentuar të ndikojë dhe destabilizojë jo vetëm zgjedhjet e fundit në Bundestag, por edhe çështjet e brendshme të Republikës Federale të Gjermanisë në vazhdimësi”, shtoi ai.
Ambasada ruse në Berlin nuk ka reaguar menjëherë ndaj këtyre akuzave.
”Në koordinim të ngushtë me partnerët tanë evropianë, do të merren një seri masash kundër Rusisë për të ndëshkuar sulmet e saj hibride”, njoftoi zëdhënësi i diplomacisë gjermane.
“Gjermania planifikon të mbështesë sanksione të reja individuale ndaj aktorëve hibride në nivel të BE-së, që përfshijnë ndalime hyrjeje në BE, bllokim të aseteve të tyre dhe ndalim të aksesit në burime ekonomike”, shtoi ai.
Leave a Reply