Veprimet e Pekinit nuk janë të favorshme për paqen rajonale, thanë ministri i japonez i Mbrojtjes, Shinjiro Koizumi dhe homologu i tij amerikan, Pete Hegseth, gjatë një bisede telefonike, pasi avionë kinezë përgjuan me radarë avionët japonezë pranë Tajvanit.
Sipas Tokios, incidenti ndodhi më 6 dhjetor, vetëm pak javë pasi deklaratat e kryeministres Sanae Takaichi për mundësinë e ndërhyrjes ushtarake të Japonisë në rast të një sulmi kinez ndaj Tajvanit shkaktuan zemërim në Pekin.
Mediet japoneze raportuan se deklarimet e Takaichit në parlament ishin të paplanifikuara dhe tejkalonin tekstin e përgatitur.
Incidenti i radarit u pasua këtë javë nga patrullime të përbashkëta ajrore kino-ruse rreth Japonisë.
Koizumi dhe Hegseth diskutuan për situatën gjithnjë e më të rëndë të sigurisë në Indo-Paqësor, duke përfshirë edhe përplasjen e fundit, dhe shprehën “shqetësim serioz” për çdo veprim që rrit tensionet.
Koizumi akuzoi Pekinin se po shpërndan “informacione krejtësisht të pavërteta” për incidentin, por theksoi se Japonia nuk kërkon përshkallëzim dhe po përgjigjet “me qetësi”, duke mbajtur të hapur kanalin e dialogut.
Sipas SHBA-së, në qendër të bisedës ishin edhe aktivitetet ushtarake të Kinës, rritja e shpenzimeve të mbrojtjes së Japonisë dhe forcimi i kapaciteteve të saj.
Leave a Reply