Ish-zëvendësministri i Brendshëm, Julian Hodaj, ka reaguar pas ngjarjeve të ditëve të fundit, të përplasjeve mes protestuesve dhe punonjësve të policisë së shtetit pranë selisë së Kuvendit të Shqipërisë. Në reagimin e tij, Hodaj dënon dhunën ndaj policisë dhe përpjekjen për të krijuar konflikt e përplasje.
Reagimi i plotë i ish-zv/ministrit të Brendshëm, Julian Hodaj:
“Si dikush që ka shërbyer për pothuaj një dekadë në Ministrinë e Brendshme, njoh mirë çfarë është Policia e Shtetit dhe po ashtu, njoh personalisht edhe shumë prej grave e burrave që shërbejnë në këtë organizatë të nderuar.
Dhuna ndaj punonjësve të policisë
ështê një akt i dënueshëm dhe i pajustifikueshëm nga çdo lloj qëllimi apo synimi!
Jam bindur se kushdo nga ata që manifestuan këto javë, për diçka që mendojnë të drejtë, nuk bie dakord me primitivitetin e asaj që pamë ditët e fundit para Parlamentit, duke dhunuar deputetë e punonjës të policisë.
Ata mbrojtës të ligjit janë garantët tanë çdo ditë të vitit, ditën apo natën, në dimër apo në verë. Diçka nuk duhet harruar: Ata njerëz me uniformën e policisë janë aty, çdo herë, kur ne kemi nevojë!
Pardje dhe sot, ca dështakë politikë serialë, që deri dje hidhnin molotovë, po mundohen të vjedhin iniciativën e atyre që për katër javë manifestuan idetë në mënyrën më qytetare të mundshme. Këta qaramanë dhe qurravitës në kamera, harbutë, të pafytyrë e të paskrupullt në trotuar, që këto tre ditë u munduan me të gjitha mënyrat të krijojnë konflikt e përplasje, duhet të përgjigjen para ligjit, sepse shoqëria ua ka vënë vulën me kohë
.
Shërim të shpejtë policëve të dëmtuar gjatë protestës së sotme pranë Kuvendit.
Vajza dhe djem të Policisë së Shtetit, keni gjithë solidaritetin tim
.”
Leave a Reply